Eskari gehienak, % 86, etxebizitzen beharretarako izan zirela jakin eragin dute Amankomunazgotik. Aurreko urtetik dezente igo zen 2013an gizarte larrialdietarako diru-laguntza eskaria. 451.435 euro banatu ziren guztira, 281 herritarren artean. Euretatik 169 gizonezkoak izan dira, eta 212 emakumezkoak. Eskaria egin duten pertsonetatik % 42 bakarrik bizi da, % 41 familian eta % 16 bikote batekin.
Eskatzaileen jatorriari dagokionez, % 51 bertokoak izan dira, eta % 49 atzerritik etorritakoak. Diru laguntza hauek "egoera larrian edota gizarte-bazterketa egoeran egon daitezkeen pertsonei" ematen zaizkiela azaldu du Oskar Zarrabeitia Amankomunazgoko presidenteak. Ohiko eta ez-ohiko gastuei aurre egiteko laguntza da.
2014rako, Eusko Jaurlaritzak 406.000 euroko diru-poltsa emango dio Amankomunazgoari, laguntza mota hau kudeatzeko. 2013an, laguntza 349.885 eurokoa izan zen. Eskarien arabera, diru kopuru hori agortzen bada, Amankomunazgoak ipiniko luke beharrezko dirua.