Martitzenean eman zuten deialdiaren berri Ikasle Abertzaleek. Adierazi zuten ez daudela batere ados gaur egungo hezkuntza sistemagaz: “Kapitalismoan pieza bat gehiago izateko hezten gaitu”. Euren artean lehiatzeko eta indibidualistak izateko prestatzen dituztela kritikatu zuten, ustez balio dutenen eta balio ez dutenen artean bereizten dituztela, generoaren arabera banatutako rolak garatzen dituztela... Gainera, zazpi lurraldeetako nazio ikuspegia baztertzen dela uste dute, eta euskalduntzea bermatzen ez duten ereduak bultzatzen direla ikastetxe batzuetan.
Ikasle Abertzaleen arabera, LOMCE legeagaz “zapalkuntza guzti horiek muturreraino eroan gura dituzte”.
Mugimenduaren “eztanda”
Egoera horri buelta eman guran greba egingo dute Bizkaiko gainerako ikasleekin batera martxoaren 27an. “Ezinbestekoa da egungo eredua errotik irauliko duen ikasle mugimendua eztandaraztea”. Eta dinamika horren harira egin dute manifestaziorako deialdia. Ikasleetaz gainera, LOMCE legearen kontra dauden herritar guztiak animatu dituzte mobilizazioan parte hartzera.