Kultur etxean izango dira zikloko lau emanaldi, eta 5 euro balioko dute sarrerek. Doako sarrera edukiko du, aldiz, maiatzaren 16an, Andikoako baselizan izango den emanaldiak. Kherau boskote bilbotarrak eskainiko du kontzertu hori.
19 urteko Belén Álvarez kanariarra da Bel Bee Bee, eta bandak lagunduta ariko da bihar, Berrizen: ondoan izango ditu Adex Alonso, teklatuetan, eta Gabi Gonzalez, baterian. Hirukote horrek zabalduko du Berrizko Tren Geltokiko Musikariak zikloa. Hala ere, eskaintza musikal bikoitza da asteburukoa, lehenago ere Berrizen jotakoa den Madrilgo The Big Bench-ek ere joko duelako, baina, oraingoan, talde formatuan. Rest of the soul diskoa aurkeztera dator taldea.
Maiatzaren 8an, ostera, Amorante izeneko bakarkako proiektua aurkeztuko du Iban Urizar elgoibartarrak Berrizko zikloan. Aukhera bigarren diskoko kantak joko ditu, 16an, Bilboko Kherau taldeak. Eta rock alternatiboa egiten duen The Owl Project Markiñako taldeak itxiko du, maiatzaren 22an, musika zikloa.