Herriguneko inbertsioen batzarretan 100.000 euro nora bideratu izan dute eztabaidagai, eta auzuneetako batzarretan, 50.000 euro. Herriguneari dagokionez, aterpea eraikitzea onartu dute inbertsioen artean, eskolatik jantokira joaterakoan umeak ez bustitzeko. Gainera, egurrezko jarlekuak ipiniko dituzte, eta orain dauden harrizko jarlekuei egurra jarriko diete.
Futbol zelaiko aldageletan berogailua jartzea ere onartu dute, futbol taldeak horrela eskatu duelako. Azkenik, Zengotita eta Iturritza kaleen bidegurutzeko eraikinean grafiti bat margotzea erabaki dute batzarretan. Herriko arkitekturari kolorea ematea eta horma hori txukuntzea da asmoa.