Espainiako gobernuko delegaritzatik egindako eskaria bete dute horrela Berrizko udaletxean. Durangaldeko udaletxe gehienetan dago ipinita honezkero Espainiako bandera.
Herrian zabaldu duten bandoan udal arduradunek azaldu dutenez, bandera jartzeko eskaria ekiditzen saiatu dira, "nahiz eta ez betetze horrek zuzeneko ondorio penalak ekarri". Espainiako Gobernu Delegaritzak behartutako neurriak bizikidetza eta bake sozialean ez duela laguntzen adierazi dute bandoan: "bakearen eta bizikidetzaren bidetik aurrera egin behar du Euskal Herriak, eta ez inposaketa eta gatazkaren bidetik". Udaletxeko fatxadako lau banderez gainera, udaletxe aurrean, orain arte bezala ikurriña handia izaten jarraituko dute Berrizen.
