Aurrerantzean, beraz, herritar guztiek ordaindu beharko dute zabor bilketako tasa. Jose Luis Navarro alkatearen berbetan, "abadiñar guztiek erabiltzen dute zabor bilketa eta birziklatze zerbitzua, eta, hortaz, denek lagundu behar dute zerbitzua mantetzen".
Abadiñoko gobernu taldeak azpimarratu duenez, ordenantzan aldaketa hau egin orduko, hondakinak biltzeko guneak atondu dituzte baserri guneetan ere: "Durangaldeko Mankomunitatearekin batera martxan jarritako sistema horri esker baserri-auzoek hiriguneen erraztasun berdinak dituzte hondakinak birziklatzeko", azpimarratu du Abadiñoko gobernu taldeak.
Zaborren ordenantzan aldaketa egitea proposatzen zuen herenegungo udalbatzarreko puntu horretan, abstenitu egin zen Bildu. Udalak baserri guneetan ez duela hirigunean besteko zerbitzurik eskaintzen uste du Bilduk. Ibai Urrutia zinegotziak udalbatzarrean esan zuenez, nekazal guneetako herritarrak tasa murritzago bategaz konpentsatzea proposatu zuen, horregatik, Bilduk batzordean. Proposamen horrek, baina, ez zuen beste alderdien babesik eduki.
Eneko Etxebarria EAJko bozeroaleak, bestalde, bilketa gune berrien kokalekuak egokienak diren ikusteko, jarraipena egiteko beharra azpimarratu zuen, martitzeneko udalbatzarrean.