Jaia irudi ederrenean islatzen duenak 400 euro poltsikoratuko ditu, eta bigarren lan onenaren egileak 250. Gainera, herriko argazkilari onenarentzat 150 euroko accesita gorde dute.
Kolorez edo zuri-beltzean
Argazki lehiaketako partaide bakoitzak argazki bi aurkeztu ahalko ditu gehienez. Koloretan edo zuri-beltzean, bietara onartuko dituzte epaileek; hori bai, originalak eta inon argitaratu bakoak izan beharko dute. Aurkezteko moduaren inguruan, hainbat ohar eman dituzte antolatzaileek: euskarri gogorrean aurkeztu behar dira, eta, gutxi gorabehera, 30x40 zentimetroko tamaina eta bi milimetroko sendoera eduki behar dituzte.
Gainera, argazki bakoitzaren atzean titulua idatziko dute argazkilariek, eta inskripzio fitxa bereizitako gutunazal batean sartuko dute, horri ere argazkiaren tituluaren erreferentzia emanda.
Otsailaren 13an, 20:00etan, amaituko da lanak entregatzeko epea, eta Errota kultur etxean edo Udal Mediatekan jasoko dituzte lanok.
Erabakia, 20an
Lan guztiak jaso ostean, epaimahaiak otsailaren 20an emango du bere erabakiaren berri. Arratsaldeko 19:00etan egingo dute sari-banaketa ekitaldia, Errota kultur etxean.
Gainera, lehiaketara aurkeztutako lan onenak aukeratuko dituzte epaileek, eta herritarrentzat ikusgai ipiniko dituzte erakusketa batean. Hilaren 20tik martxoaren 6ra bitartean egongo da erakusketa, Errotan.