Eguerdiko 14:30ean Zelaietako herri eskolako sukaldariek gas usaina zegoela iritzita suhiltzaileei deitu diete. Bitartean umeak eskolatik atera dituzte. Berehala, suhiltzaile kamioi bat, ertzaintzaren furgoneta bat eta Abadiñoko udaltzaingoa bertaratu dira gas ihesa izan zitekeelakoan. Bazter denak aztertu, baina ez dute gas isuririk aurkitu. Ertzainen esanetan, "eraikinaren azpitik ur zikinak doazenez, baliteke sukaldariek usaindutakoa metanoa izatea". Arriskurik ez zegoela ikusita, 15:15 inguruan joan dira eta kanpoan zain zeuden gurasoek seme-alabak batu dituzte.